ក្រៅតែពីអ្នកធ្លាប់ជាអ្នកគូរប្លង់ស្រាប់ មិនមានអ្នកស្គាល់ច្រើនឡើយពីប្លង់ប្រភេទមួយនេះ គេភាគច្រើនស្ពាល់តែប្លង់Typical Drawing ឬ Shop Drawing ជាដើម ប៉ុន្តែប្លង់ឈ្មោះថា As-Built Drawing នេះហាក់គេនៅស្រពេចស្រពិលពីនិយមន័យនៃប្លង់នេះនៅឡើយ។

ប្លង់ As-Built Drawing គឺជាប្លង់ដែល បានធ្វើការគូរកំណត់ និងអនុម័តដោយអ្នកសាងសង់ ក្រោយពេលដែលសំណង់ត្រូវបានបញ្ចប់រួចរាល់។ ដោយហេតុតែការសាងសង់ជាក់ស្តែងប្រាកដជា នឹងមានបញ្ហាណាមួយ ដែលមិនអាចចៀសវាងបាន ដែលអាចនឹងនាំឲ្យមានការកែប្រែភ្លាមៗខុសពីប្លង់ដែលបានសិក្សានៅដំណាក់កាលមុនការសាងសង់ប្រព្រឹត្តិឡើង។

បន្ថែមពីនេះ ប្លង់ As-Built ត្រូវបានបង្ហាញពីបម្រែបម្រួលនៃរូបរាងនៃមុខកាត់នីមួយៗ, ប្រវែងនៃមុខកាត់ជាក់ស្តែង, សម្ភារៈសាងសង់ និងកំណត់សម្គាល់(Specification) មួយចំនួនទៀតដែលខុសគ្នាពីប្លង់ដើម ដោយប្លង់នេះនឹងត្រូវរក្សាទុក ជាការភស្តុតាងសម្រាប់ការសិក្សាអគារនោះនៅថ្ងៃអនាគត ប្រសិនបើអគារត្រូវធ្វើការកែប្រែជាថ្មី ឬបន្ថែមជាន់ ឬការផ្លាស់ប្តូរមុខងារនៃអគារជាដើម។

តើប្លង់ប្រភេទនេះ មានសារៈសំខាន់អ្វីខ្លះ? ហេតុអ្វីការសាងសង់អគារត្រូវមានប្លង់ប្រភេទនេះ?

រាល់គម្រោងនៅប្រទេសយើងភាគច្រើន ការសិក្សាប្លង់មានត្រឹមតែនៅដំណាក់កាលមុនសាងសង់ប៉ុណ្ណោះ ឬអស់ហើយត្រឹមការសិក្សាប្លង់ Shop Drawing។ ដោយឡែកការសិក្សាប្លង់ As-Built Drawing គឺកម្រមានណាស់ ដោយហេតុតែម្ចាស់គម្រោង ពោលគឺ Clients មិនទាន់ដឹងពីសារៈសំខាន់នៃប្លង់នេះ ទើបគាត់យល់ថាវាជារឿងមិនចាំបាច់នឹងត្រូវចំណាយថវិកាលើការសិក្សា។ ដូច្នេះក្នុងឋានៈយើងជាវិស្វករ ឬជាអ្នកដេញថ្លៃគម្រោង យើងអាចពន្យល់គាត់ ពីសារៈសំខាន់របស់ប្លង់ប្រភេទនេះដូចខាងក្រោម៖

ប្លង់ As-Built នឹងផ្តល់នូវរាល់ព័ត៌មានត្រឹមត្រូវបំផុតរបស់អគារ ក្រោយការសាងសង់រួចរាល់ ត្បិតដំណាក់កាលសាងសង់នឹងមានលក្ខខណ្ឌត្រូវបត់បែនមួយចំនួនដោយចៀសមិនបាន ដែលនាំឲ្យខុសពីប្លង់ដើម។

ប្លង់ As-Built នឹងបង្ហាញពីព័ត៌មានលម្អិតពីការបំពាក់នូវគ្រឿងបរិក្ខាអគារ និងគ្រឿងសំណង់ផ្នែកខាងក្នុងគ្រឿងបង្គុំ ដែលរាល់ព័ត៌មានទាំងនេះ នឹងវិវត្តទៅជាអំណះអំណាងដល់ម្ចាស់គម្រោង ប្រសិនបើថ្ងៃអនាគត អគារត្រូវការភាពចាំបាច់ក្នុងការកែប្រែរចនាសម្ព័ន្ធអ្វីមួយ។

ក្នុងករណីអគារជាអគារ Condo ឬ Apartment ឬអគារជួល ឬលក់ក្នុងកាលៈទេសៈណាមួយ ប្លង់ As-Built នឹងក្លាយជាឯកសារយោងដ៏មានតម្លៃបំផុត ដែលជាមូលដ្ឋានគ្រឹះឲ្យអ្នកទិញអគារនោះធ្វើការវិភាគ និងវាយតម្លៃតម្លៃពីលក្ខណៈសម្បត្តិនៃអគារ ដែលនាំឲ្យដំណើរការទិញ-លក់ មាននូវតម្លាភាពរវាងអ្នកលក់ និងអ្នកទិញ ដែលជាកត្តាមួយនៃជំនឿចិត្ត ឬភាពស្មោះត្រង់ក្នុងអាជីវកម្មផងដែរ។